Európa

Európa yondë Cemenessë ná.

Nóritecië[]

Európa caita forna percoronessë Cemeno, as Asia rómenessë, Afarica hyarmenessë ar Eäron Atalantëo númenessë. I pelma imbë Európa ar Afarica Eär Endórëa ná. I pelma norëa lá tanca — linë ingolmor quetir i caitas Orontissen Uralo. Sië, Európa yo Asia notina ve yondë min, Eurasia.

I hyarmen Európo ná orontinqua ambë lá i formen. Hyarmenessë caitar tárë ortostar: Alpi, Pirenëar ar Carpatyar, ar formenessë caitar i Oroscandinavië.

Lúmequentalë[]

I nossë Homo marë Európassë arsintavë apa 1,800,000 coranári. Homo sapiens Európanna tena yá 40,000 coranári. I Urustarwa Randa eyestië Európo húmecoranár 6essë n.H., i Tambearwa Randa — húmecoranár 3essë n.H. Anga Európanna tultaina Foinicerenen haranyë 8essë n.H.

I órë haimë Hellenórëo atannië i yesta Yariëo. Sina randa né anvaldëa haimë Európinan. I Hellenóri enapanië olyar cévier masematican, nolmen, lúmenquetalën ar lairestan. I aryon haimevëa Hellenorëo né i Altaranië Romenórin. Tas eryar valdear rantar haimë Európino ontaina ve sanyesta. Lúmissen i Hristië ayestië ar palyanë Altaraniessë Romenórin.

Haranyë 5essë a.H. i Altaranië Romenórin alantië, nancarina hravaninen. I harani 5e tenna 15e a.H. né i Enderanda. Olë haimeo Yariëo vanwa né, antulcavë lúmi arinyessë Enderando, i Morna Randa. Lúmissen Európa astaina mi aranielí né, yassen i túrë haryaina i arqueni ar i cordamor.

Haranyë 13essë i órë ostomor Italinóressë atyarië i Ennosta. Randassë sina, carmi rincaner firyarenen ve Rafael, Micelangelo ar Leonardo Vinciallo. Vanyië ar nolwë Yariëo enhiraina né. I Pelë Ingoleo, antulcavë matematicassë, elenolessë ar fisicassë, atalmië ingolë sírë. Apa Columbus ahirië America coranáressë 1492, i aranier Europo paluner tassenna.

Ostomor Európo, antulcavë i macari, querner alyar ar túrinquar ar canner imyar vanimer ve arquendi. Sina tulyanë Pelë Altanna Faranconóro ar yestanna Minyë Liearda Faranconóro coranáressë 1789. Nán rato Napoleon amapië i túrë Faranconóressë ar etúrië olë Európo nó turuaina coronáressë 1815 né.

18essë ar 19essë haranyer né i Pelë Tanweo. Hirë curvestar vinyaron atyarië larcá olé ostor ar lio firyaron. I canë ambëo autë né i autalë altaraniendesto. I cotië imbë norion Európo antulcavë i Ohta Ambaro Minyanna, ye ná coranaressë 1914-1918. Apa sina ohta, limbë arani Európo alantanë. Minë ranta nóri sinaron aquerië lieardannar. Nán Russonóressë pelë uovendesto (i Pelë Narqueliëo) aturië.